MCHUNGAJI BUKUKU AKEMEA WATANZANIA WALA RUSHWA

Wito umetolewa kwa viongozi wa nchi ya Tanzania kujiepusha na vitendo vya rushwa ili nchi iendelee kuwa na Amani na Utulivu.

Akihubiri katika Ibada ya Jumapili Mchungaji Benjamini Bukuku wa Kanisa la Tanzania Assemblies of God Amani Cathedral Centre lililopo Soweto Mjini Moshi amesema watanzania wamekuwa wakijidanganya kwamba nchi hii haijaendelea katika Nyanja mbalimbali.

Mchungaji Bukuku ameongeza kusema nchi hii imeendelea kweli kweli katika Nyanja ya rushwa hali ambayo inaweza kuitumbukiza katika machafuko makubwa na umwagaji wa damu.

Pia amesema kwamba vitendo vya rushwa vinavyoendelea kwa sasa vinaongeza laana kwa kila jambo ambalo Tanzania itataka kulifanya halitafanikiwa kwani Mwenyezi Mungu atakuwa ameondoa mkono wake.

Hata hivyo amewataka viongozi wanaosimamia vitengo mbalimbali kusimama kidete kukemea rushwa ama kwa kupokea au kutoa kwa kufanya hivyo huruma za Mungu zitairudia nchi ya Tanzania.

Aidha amekemea unafiki wa baadhi ya viongozi nchini kujifariji kuwa nchi hii ipo salama huku wakiendelea kufanya vitendo viovu.