Viongozi wa dini watema nyongo serikali kuvamia maeneo ya ibada

VIONGOZI mbalimbali wa Dini wamelaani vikali matukio ya baadhi ya viongozi wa serikali kuvamia maeneo ya Ibada na kuwashambulia wananchi kwa risasi, na kuiomba serikali kuyavalia njuga matukio ya aina hiyo.

Wakizungumza kwa nyakati tofauti huku wakitolea mfano tukio la hivi karibuni ambapo Mkurugenzi wa halmashauri ya wilaya ya Itigi mkoani Singida Pius Luhende, anadaiwa kuvamia kanisa la Waadventista(SDA), Wasabato akiwa ameambatana na viongozi wenzake na kumfyatulia risasi muumini huyo, akiwa ibadani na kusababisha kifo chake.

Akizungumzia tukio hilo, Askofu Mkuu wa Kanisa la Victorious la mjini Moshi, mkaoni Kilimanjaro Dk Sixbert Mkelemi amelaani vikali kitendo hicho na kufafanua kuwa, eneo la Ibada  linapaswa  kuheshimiwa na siyo kugeuzwa uwanja wa vita.

“Sisi viongozi wa dini tumekuwa tukishirikiana na serikali katika masuala mbalimbali ya kiroho na hata ya kijamii, na tukio lililotokea mkoani Singida, linalodaiwa kufanywa na kiongozi wa serikali la kumpiga kijana mdogo kama yule risasi katika eneo la Ibada na kusababisha  kifo chake limetushtua na kutushangaza sana”, alisema Mkelemi na kuongeza, tunaomba sheria ifuate mkondo wake.

Askofu Dk Mkelemi aliendelea kusema kuwa, kama muumini huyo alikuwa akisakwa na mamlaka za kiserikali wangemsubiri atoke Ibadani ama wangetumia njia yoyote ya kumuita badala ya kuvamia Kanisa na kumfyatulia risasi zilizotoa uhai wake jamabo lililosababisha taharuki kwa waumini wote Ibadani hapo.

“Viongozi Kupewa madaraka siyo kwenda kuumiza ama kuwaua watu; hali kama hii ikiendelea amani tunayojivunia kuwa nayo hapa nchini itatoweka kama vile barafu iyeyukavyo inapopata joto”, alisema.

Makamu Sheikh wa Bakwata Mkoa wa Kilimanjaro Mlewa Shaban na Katibu wa Bakwata Mkoa wa Kilimanjaro Awadhi Lema, walitoa wito kwa viongozi wa kiserikali, kuacha kutumia vibaya nafasi zao walizoaminiwa na Rais Dk John Magufuli.

Aidha viongozi hao wamewataka waumini wa madhehebu ya Kikristo na yale ya Kiislamu kuwa watulivu wakati vyombo vya ulinzi na usalama vikiwa vinafanya kazi zake ambapo walitoa rai kwa haki itendeke katika kushughulikia swala hilo.

Kwa upande wake, Askofu Mkuu wa Kanisa la Furaha Tanzania (KLFT), Jones Molla amelaani kitendo hicho na kusema kuwa nyumba za Ibada zinapaswa kuheshimiwa.

Naye Askofu mkuu wa Kanisa la International Christian Centre (KICC) la mjini Moshi, Dk Glorious Shoo, amelaani kitendo hicho na kuiomba serikali ichukue hatua mara moja dhidi ya tukio hilo la mauaji ya kutisha tena ndani ya nyumba ya Ibada.

“Natoa ushauri kwa viongozi wakuu waandamizi turudi tulikotoka kwani awali ilikuwa mtu hapewi nafasi kubwa ya uongozi bila kupitia mafunzo maalumu ya uongozi kutoka Chuo cha Uongozi Kivukoni; sasa hivi kuna utofauti kwani kuna viongozi wanapewa madaraka bila kupata elimu ya maadili ya uongozi”, alisema Dk. Shoo.

Askofu Dk Shoo pia alipendekeza kuwa watumishi wa Umma wanaopewa ajira wawe ni wale wenye hofu ya Mungu, ambapo pia alipendekeza kuwepo na semina elekezi ili kuwafunza watumishi wa umma maadili mema ili kuepuka yale yaliyotokea Singida.

Story by: Kija Elias

Edited by: Jabir Johnson

Photograph: Bruxy